Eyþór Árnason

11.10.2007 | 23:40

Súlan

Kom í bæinn í morgun. Gott flug frá Ísafirði og góðir dagar fyrir vestan. Manni er tekið svo vel, öllu reddað ef maður er með vesen og vantar eitthvað. Svo lendir maður hér og þá breytist allt. Að vísu var morgunninn rólegur, en svo fór allt á flug eins og allir vita. Og út um gluggann hér í Vesturbænum blasir súlan við. Súlan í Viðey. Og hún er flott. Alveg klikkuð. Í augnablikinu heldur hún uppi skýjunum, þráðbein eins og símastaur. Og þó að það hvessi haggast hún ekki. Magnað. Ringó kom. Það var flott. Hann var trommari Bítlanna. Ég heyri útundan mér að þeir sem yngri eru taka þessu súlumáli af meiri léttúð en ég. Það er kannski skiljanlegt. En fyrir mér er þetta galdur, undur og stórmerki. Í útlöndum er að hefjast leit að geimverum og það af fullum þunga. Við getum verið róleg. Við bíðum bara og horfum á súluna. Geimverurnar koma hingað ef þær koma. Súlan sér um það. Svo verður litla stelpan mín þrettán ára á morgun. Tíminn líður. En súlan, hún hefur ekki haggast síðan ég leit út áðan.

Flokkur: Bloggar | Facebook

Athugasemdir

Vonandi að friðurinn verði einhverntíma jafn stabíll og vindheldur í heimi hér. Til hamingju með litlu skvettu. Vissi að þú yrðir ekki fyrir vonbrigðum með frændur mína á Ísó. Það yrði stærri frétt en borgarstjórnarslit ef svo yrði.

Jón Steinar Ragnarsson, 12.10.2007 kl. 03:08

Til hamingju með litlu stelpuna þína

Ragnheiður Ástvaldsdóttir (IP-tala skráð) 12.10.2007 kl. 06:37

Súlan er flott - þegar ég sá hana (í skýjunum) heiman frá mér við Elliðavatn, þá datt mér Batman í hug! En líklegast er það rétt hjá þér að geimverurnar koma líklega til með að nota hana sem lendingarljós - ekki ónýtt það.

Til hamingju með táninginn!

Ingibjörg Gunnarsdóttir, 12.10.2007 kl. 08:56