Mánudagskvöld

Það er mánudagskvöld og langri vinnuhelgi lokið sem endaði auðvitað með skralli í gærkveldi þannig að dagurinn í dag hefur verið frekar mjúkur og tiðindalaus. Settist niður áðan og horfði á mynd um byltinguna í Rússlandi. Það er svo gaman að hlusta á rússnesku. Þetta er svo fallegt mál og þó ég skilji ekki orð þá er mér sama. Mér þykir líka einhvern veginn svo vænt um Rússa. Þeir eiga svo flott lög og syngja svo fallega. Og nú er ég að hlusta á Don-kósakkakórinn synga Kvöldklukkurnar. Hvað er betra, þegar maður er sjálfur svolítið viðutan, en að hlusta á raddir sem eru vart af þessum heimi?   

Athugasemdir

[Hallgrímur Óskarsson (IP-tala skráð) 12.11.2007 kl. 22:38]

Sammála, það er eitthvað kyngimagnað við rússneskar raddir í samsöng.  Fyrsta platan sem keypt var á mínu heimili var með hinum rússneska stórtenór Ivan Rebroff.  Svo hef ég kynnst rússneskum kirkjusöng og kórum og finnst þetta yfirleitt vera mjög stórfenglegt.  Bestu kveðjur, Hallgrímur

[Einar Bragi Bragason., 12.11.2007 kl. 23:58]

flottur............annars finnnst mér sænskan vera söngmál engla

[Árni Gunnarsson, 13.11.2007 kl. 00:43]

Kvöldklukkurnar með Don kósökkunum er stórkostleg músík sem kemur út hjá manni gæsahúðinni. Þó hefur einn íslenskur kór slegið þessum kór við og það var Karlakór Reykjavíkur árið 1937. Þá sungu þeir Ökuljóðin í söngferðalagi til Norðurlandanna og einsöngvarinn var Stefán Íslandi eins og við vitum. Þeir sungu þetta lag inn á plötu og sú upptaka er nokkuð oft spiluð.

Ég leyfi mér að segja að söngur Stefáns í þessu lagi sé fullkominn. Þá er ég að meina að ég efast um að þetta lag hafi verið- eða verði sungið betur.

Ég fellst reyndar á að rússneski kórinn sé betri í upptöku þeirra á laginu en einsöngvarinn þolir engan samanburð við Stefán.

Enda ekki hægt að gera betur.  

[Eyþór Árnason, 13.11.2007 kl. 22:32]

Já Hallgrímur; Rebroff fannst manni ótrúlega magnaður. Það voru til plötur með honum heima og ég spreytti mig á að athuga hvað ég kæmist hátt og langt niður. Sá hann svo á tónleikum í Háskólabíói og var kannski ekki alveg eins hrifinn þá. Og Einar: Sænskan er nátturlega svo vacker að ég er viss um að Jusse B. er einn af höfuðenglunum. Trúlega er Cornelis ekki langt undan. Og Árni: Stefán er og verður okkar maður. En gleymum ekki Sidda frænda. Kannski syngur hann Kvöldklukkurnar tærast af öllum nú til dags.