Blús í D-dúr op. 3

Nú ágústnóttin breiðir blæju mjúka

það bærist lauf í vígaferlabænum

En hælis fyrir sárfætta og sjúka

sannlega er þörf í einum grænum

 

Á fimmtudegi fjórtánda í ágúst

flaug í gegnum loftið fyrir ljóra

að D-liðið af staðfestu með strákúst

stuggað hefði fast við borgarstjóra

 

Nú sópað hafa senjór út af baugnum

og sólin brátt til viðar niður hnígur

En svekktur galar hauslaus uppá haugnum

hani sem að ekki lengur flýgur.

 

Hann Frímann átti' að fylla Óla stuði

og forða honum burt frá öllu fári

En bratti Óli skellti' á bitru suði

og banabitinn reyndist Gunnar Smári.

 

Nú ólmast um á básnum sínum bláa

borgarstjórnarháaleitisnautið

Því frést hefur að framsókn eigi gráa

furðuskepnu sem að þýðist flautið

 

Og framsókn góða fyllti tóma básinn

og fullnægingarblossar loftið lita

En fölur missti Óli fokkings ásinn

nú förukonur henda í hann bita.

 

Úti á túni tárast vinstri hjörðin

og tregar löngu gleymda hundrað daga

Því svikul reyndist gamla söðulgjörðin

sem söngvarana teymdi milli laga.

 

Svo syngja þau er sópa fóðurganginn

segulstöðvarblús og Svantes-vísur

Og kálfahópur kátur fær í svanginn

kýlir vömb og dregur síðan ýsur 

 

Og það sást til Kobba keyra' í Vesturbænum

kominn var í svörtu vetrarfötin.

En Marsibil er selurinn í sænum

sem syndir um og andar inn í götin.

 

Og prunknir D-menn panta jólaskrautið

en pakkarnir þeir eru upp og niður.

Því leidíin sem leidd var undir nautið

ljóstraði' upp hún væri húsasmiður. 

 

Athugasemdir

[valla frænka (IP-tala skráð) 15.8.2008 kl. 14:06]

ja hérna hér, þú ert nú meiri snillingurinn :)

[Lára Hanna Einarsdóttir, 15.8.2008 kl. 15:42]

Þetta er tær, brilljant snilld!  Kærar þakkir.

[Magnús Guðjónsson, 15.8.2008 kl. 23:54]

Flottur blús  Eyþór,  það  hefur aldrei verið jafn  "Gott að búa í Kópavogi"  og  nú ..

[Hallmundur Kristinsson, 16.8.2008 kl. 01:29]

Já, þetta er góður bragur. Ég ætlaði að snara í eina vísu um þetta mál en var orðlaus!!

[Einar Bragi Bragason., 16.8.2008 kl. 01:31]

Væri mér heiður að sjá þig í Gvendarbrunnum 22. Ágúst

[Lilja Guðrún Þorvaldsdóttir, 16.8.2008 kl. 02:05]

Hrein og bein "Tær snilld", algjörlega tær snilld. - Mikið assgoti ertu hagmæltur strákur!

[Kristján Kristjánsson, 16.8.2008 kl. 15:30]

Flottur Ráðhúsblús :-)

[Eyþór Árnason, 18.8.2008 kl. 22:26]

Takk fyrir innlit... og hólið!